Ոմանք սուրճը համարում են երկարատեւ աշխուժացման միջոց, բայց իրականում այս ըմպելիքը կարող է նաեւ քնկոտություն առաջացնել: Ուրոլոգ Ալեքսանդր Ձիձարիայի (Ռուսաստան) խոսքով՝ եթե սուրճի օգտագործումը նույնիսկ էներգիայի հոսք է հաղորդում, ապա այդ աշխուժացնող ազդեցությունը երկար չի տեւում:
Նրա խոսքով՝ սուրճը կարող է քնկոտություն առաջացնել, առաջին հերթին դա վերաբերում է ըմպելիքի լուծվող տեսակներին: Այս ազդեցությունը բացատրվում է դրանում երկու բաղադրիչների՝ կոֆեինի եւ թեոբրոմինի առկայությամբ:
«Դրանք սիներգիայի մեջ չեն աշխատում: Սկզբում կոֆեինը ձեզ աշխուժացնում է, իսկ հետո միանում է թեոբրոմինը, որը հակառակ ազդեցություն ունի: 20-30 րոպե եւ ձեր ճնշումն իջնում է, քնել եք ուզում»,- ասել է մասնագետը:
Եթե ավելի երկար ակտիվություն է անհրաժեշտ, ապա ավելի լավ է խմել հատիկավոր սուրճ, ընդ որում՝ աղալուց անմիջապես հետո եփած: Այս ըմպելիքը պարունակում է կոֆեինի բարձր չափաբաժին, նշել է մասնագետը:
