MediaArm.am Որովայնի հատվածում ճարպաշերտերի կուտակումը բավական տարածված խնդիր է, որի դեմ պայքարում են միլիոնավոր մարդիկ։ Մասնագետները հաճախ են հորդորում միջոցներ ձեռնարկել այս խնդրից ազատվելու համար, քանի որ այդ հատվածում ճարպի չափազանց մեծ քանակությունը զգալիորեն բարձրացնում է առողջական մի շարք խնդիրների զարգացման հավանականությունը։
Սովորաբար քաշը նվազեցնելու և որովայնի ճարպային կուտակումներից ազատվելու համար մարդիկ կիրառում են տարատեսակ սննդակարգեր ու վարժություններ, սակայն մասնագետները վստահ են, որ իրականում ցանկալի արդյունքին կարելի է հասնել մի քանի մեթոդով, որոնց շարքին են դասվում ոչ միայն հատուկ սննդակարգերն ու ֆիզիկական ակտիվությունը, այլև որոշակի բնական միջոցների ընդունումը։
Գիտնականների անցկացրած եռամսյա հետազոտությունը, որին մասնակցել է 80 մարդ, ցույց է տվել, որ գոյություն ունի դեղաբույսերի մի համադրություն, որը կարող է շատ արդյունավետ լինել այս խնդրի դեմ պայքարում։ Հետազոտության ժամանակ գիտնականները կամավորներին բաժանել են երկու խմբի, որոնցից առաջինն ստացել է սպիտակ թթի, օշինդրի և պատրինջի հյութահանուկների համադրություն, իսկ երկրորդ խմբի կամավորները՝ պլացեբո։
Հետազոտությունը ցույց է տվել, որ առաջին խմբի կամավորների մոտ հետազոտության ավարտին վիսցերալ ճարպի մակարդակը նվազել է 20 տոկոսով, մինչդեռ երկրորդ խմբի մասնակիցների մոտ նման ակնհայտ դրական արդյունք չի գրանցվել։
Բժիշկների խոսքով՝ վերոնշյալ բույսերն օժտված են յուրահատուկ հատկություններով, որոնց շնորհիվ արդյունավետ կերպով այրում են վիսցերալ ճարպը։ Ավելին՝ մասնագետները շեշտում են, որ տվյալ բույսերը ոչ միայն օգնում են ազատվել որովայնի ավելորդ ճարպաշերտերից, այլև բարելավում են նյութափոխանակության համակարգի աշխատանքը։