Boeing-ի որակի վերահսկման նախկին ինժեներ Ջոն Բարնետին, ով հայտնել էր ինքնաթիռների հավաքման հետ կապված խնդիրների մասին, մահացած են գտել իր մեքենայում՝ ընկերության դեմ դատական հայցում ցուցմունք տալուց օրեր անց, գրում է The Daily Mail-ը։
Հարավային Կարոլինայի հյուրանոցներից մեկի մոտ ոստիկանությունը հայտնաբերել է 62-ամյա տղամարդու դի, ով 32 տարի աշխատել է Boeing-ում և թոշակի է անցել 2017 թվականին։ Ոստիկանությունը հայտնել է, որ մահվան պատճառը Բարնետի կողմից «ինքնահասցված» վնասվածքն է, և միջադեպը դեռ հետաքննության փուլում է:
Ինչպես նշում է The Daily Mail-ը, փաստաբան Բրայան Նոուլզն ասել է, որ Բարնետը գործով ցուցմունք է տվել անցյալ շաբաթ ինքնաթիռ արտադրողի փաստաբաններին:
Դատավարությունը բխում է Բարնետի նախկին պնդումներից, որ աշխատակիցները Boeing 787 Dreamliners-ի վրա «երկրորդ կարգի մասեր» են տեղադրել՝ արտադրության հետաձգումներից խուսափելու համար: Այնուամենայնիվ, 2017 թվականին ԱՄՆ Քաղաքացիական ավիացիայի վարչության (FAA) կողմից իրականացված աուդիտը հաստատեց նրա որոշ պնդումներ՝ Boeing-ից պահանջելով համապատասխան միջոցներ ձեռնարկել:
Հունվարի վերջին FAA-ն հայտարարեց, որ թույլտվություն չի տա Boeing-ին ընդլայնել MAX շարքի ինքնաթիռների արտադրությունը, ներառյալ 737-9 MAX-ը, և հրամայեց մանրակրկիտ ստուգել այս տեսակի բոլոր ինքնաթիռները: Այս ինքնաթիռի շահագործումն ԱՄՆ-ում դադարեցվել է Alaska Airlines ավիաընկերության Boeing 737 MAX 9-ի վթարից հետո, որը վթարային վայրէջք էր կատարել:
