MediaArm.am ՌԴ արտակարգ իրավիճակների նախարարության ղեկավար Եվգենի Զինիչևը մահացել է ծառայության ընթացքում՝ փրկելով մարդու կյանք, հայտնում է գերատեսչությունը:
«Ռուսաստանի արտակարգ իրավիճակների նախարարությունը ցավով տեղեկացնում է, որ Եվգենի Զինիչևը ողբերգական կերպով մահացել է իր ծառայողական պարտականությունները կատարելիս՝ մասնակցելով արկտիկական գոտին արտակարգ իրավիճակներից պաշտպանելու միջգերատեսչական վարժանքներին՝ փրկելով մարդու կյանք»,- ասել են նախարարությունից:
Զինիչևը ծնվել է 1966 թվականի օգոստոսի 18-ին Լենինգրադում: Ավարտել է Սանկտ Պետերբուրգի բիզնեսի և իրավունքի ինստիտուտի տնտեսագիտության և ֆինանսավարկային ֆակուլտետները: 2013 թվականին նա մասնագիտական վերապատրաստում է անցել Ռուսաստանի Դաշնության զինված ուժերի գլխավոր շտաբի ռազմական ակադեմիայում:
1984-1986 թվականներին ծառայել է Հյուսիսային նավատորմի ԽՍՀՄ զինված ուժերում: 1987-2015 թվականներին աշխատել է պետական անվտանգության մարմիններում: