MediaArm.am Երեխայի ծնունդը լրջագույն փորձություն է յուրաքանչյուր կնոջ կյանքում․ չէ՞ որ բալիկի լույս աշխարհ գալը ոչ միայն գլխիվայր փոխում է նրա առօրյան, այլ նաեւ առաջացնում ֆիզիոլոգիական եւ հոգեբանական մի շարք փոփոխություններ։ Այս ամենն իր անմիջական ազդեցությունն է ունենում նաեւ սեռական կյանքի վրա։
Զույգի հարաբերություններում սկսվում է բոլորովին այլ փուլ, որը, սակայն, կարելի է հեշտորեն հաղթահարել, եթե գիտեք, թե ինչ է ձեզ սպասվում։ Շարունակեք կարդալ եւ կգտնեք հետծննդաբերական շրջանում սեռական կյանքի վերաբերյալ ամենակարեւոր հարցերի պատասխանները։
Ե՞րբ կարելի է վերսկսել սեռական կյանքը եւ ի՞նչ բարդություններ կարող են առաջանալ
Ծննդաբերությունից հետո կնոջ օրգանիզմը դեռեւս վերականգնվելու կարիք ունի։ Ուստի մասնագետները խորհուրդ են տալիս սպասել նվազագույնը վեց շաբաթ, որից հետո նոր կարելի է մտածել սեռական կյանքը վերսկսելու մասին։ Այդ ընթացքում տեղի է ունենում հղիության եւ ծննդաբերության արդյունքում փոփոխությունների ենթարկված օրգան-համակարգերի հետադարձ զարգացման՝ ինվոլյուցիայի գործընթացը։
Իհարկե, ամենաարտահայտված փոփոխությունները տեղի են ունենում սեռական օրգանների դեպքում․ զգալիորեն կրճատվում են արգանդի չափերը, սկսվում է հետծննդաբերական արտադրության՝ լոխիայի շրջանը։ Այնուամենայնիվ, սեռական կյանքի վերսկսման հստակ ժամանակահատվածը կարող է խիստ տարբեր լինել։
«Թե երբ կինը նորից պատրաստ կլինի ապրել սեռական կյանքով, շատ անհատական է եւ կախված է թե՛ հղիության եւ ծննդաբերության ընթացքից, թե՛ կարերի առկայությունից, դրանց ապաքինումից եւ այլն։ Այս առումով ճիշտ ժամանակահատված կարող է նշել տվյալ կնոջ հղիությունը վարած գինեկոլոգը»,-մեզ հետ զրույցում մանրամասնում է բժիշկ-սեքսոլոգ Սաթենիկ Սահակյանը։
Առհասարակ, մասնագետները նշում են, որ ծննդաբերությունից հետո առաջիկա մի քանի ամիսների ընթացքում դիտարկվում է սեռական ցանկության անկում։ Սրա պատճառը ոչ միայն կնոջ առօրյա կյանքում տեղի ունեցող փոփոխություններն են, որոնք հաճախ գերհոգնածություն են առաջացնում, այլ նաեւ հորմոնալ դաշտի վերադասավորումը։
«Ծննդաբերությունից հետո էստրոգենների քանակը նվազում է, ինչը նպաստում է հեշտոցի չորությանը, եւ կարող է ցավոտ հարաբերության պատճառ դառնալ։ Սրա հաշվին սեռական ցանկությունը կարող է նվազել, քանի որ ստացվում է հետեւյալ շղթան՝ եթե հարաբերություն, ապա՝ ցավ, եթե ցավ, ապա այլեւս չեմ ուզում։ Նման դեպքերում խորհուրդ ենք տալիս օգտագործել լուբրիկանտ, որը կօգնի վերականգնել հեշտոցի խոնավությունը։
Հորմոնալ տատանումների հաշվին կարող է դիտվել նաեւ զգացողության փոփոխություն։ Օրինակ՝ եթե մինչ հղիությունը կամ ծննդաբերությունը կրծքագեղձը էրոգեն գոտի էր եւ հպումը հաճելի էր, ապա ծննդաբերությունից հետո կարող է լինել հակառակը՝ կինը կա՛մ ոչինչ չզգա, կա՛մ նույնիսկ տհաճ լինի»,- նշում է բժիշկ Սահակյանը։