MediaArm.am Դերասանուհի Ռուզաննա Մանուչարյանի և դերասան Վահան Միրաքյանի դուստրն արդեն 3 ամսական է։ Դերասանուհին հղիության ընթացքում ավելացած 15 կգ-ից 11–ն արդեն կորցրել է, բայց ցանկանում է կորցնել ևս 4-ը։ Tert.am Life-ի հետ զրույցում Ռուզաննան պատմել է նիհարելու իր տարբերակի մասին։
Դերասանուհու խոսքով՝ հղիության ընթացքում սովորաբար մինչև 20 կգ գիրանում են։ «Ես նույնիսկ այդ ընթացքում փորձել եմ հետևել սննդակարգիս։ Առհասարակ, հացաբուլկեղեն չեմ սիրում, չեմ օգտագործում, միայն լավաշ եմ ուտում։ Գուցե հենց դա օգնեց, որ 15 կգ-ից ավելի քաշ չհավաքեմ՝ չնայած հակում ունեի։ Քաշս այնքան կոկիկ ու էսթետիկ էր, որ հղիության ընթացքում չեմ նեղսրտել։ Ամուսինս, ընտանիքս ինձ միշտ մոտիվացրել են, կոմպլիմենտներ արել»,- ասաց նա։
Ըստ Ռուզաննայի՝ ծննդաբերությունից հետո 2 ամսվա ընթացքում կորցրել է 11 կգ։ «Հիմա ունեմ ավելորդ 4 կգ, որն ինձնից ոչ մի կերպ չի հրաժարվում՝ չնայած ամեն ինչ անում են դրա համար։ Այն երջանիկներից չեմ, որոնք ծննդատնից դուրս են գալիս և ունենում իդեալական քաշ ու մարմին,- ասաց նա և հավելեց, որ իր շրջապատում գտնվում են մարդիկ, որոնք իրեն հիշեցնում են ավելորդ կիլոգրամների մասին,- Երբեմն դա ինձ զայրացնում է, բայց սառն եմ դատում, հասկանում եմ՝ այս ամենը ժամանակավոր է։
Բալիկիս կրծքով եմ կերակրում, ինչը ևս պատճառ է, որ քաշս դանդաղ է վերականգնվի։ Ինձ քաշիս մասին հիշեցնող մարդկանց հիմա ուղղակի ժպտում եմ ու շնորհակալություն հայտնում, որ ևս մեկ անգամ հիշեցնում են իմ ավելորդ 4 կիլոգրամի մասին»։
Դերասանուհին ընդգծեց, որ 11 կիլոգրամը հեշտ չի կորցրել։ «Այնպես չի եղել, որ մի օր արթնանամ ու կշեռքի վրա տեսնեմ այլ թիվ։ Ես աշխատել եմ ինձ վրա, սննդակարգ պահել, դիետոլոգի հետ աշխատել։ Ծննդաբերությունից հետո այսպես, թե այնպես, սննդակարգ պետք է պահես, բայց դրանից հետո առանձին աշխատեցի նաև դիետոլոգի հետ, որի շնորհիվ կորցրի 3-4 կգ։ Բացառել եմ քաղցրն ու հացաբուլկեղենը, նախընտրում եմ բանջարեղեն։
Ինձ օգնել են նաև տեյպերի հետ կապված իմ գիտելիքները, որոնց շնորհիվ ունեմ ձիգ մաշկ։ Այս պահին սննդակարգ չեմ պահում, որովհետև չեմ հասցնում նորմալ սնվել։ Երբեմն, քաշիս հետ կապված ընկնում եմ փոքրիկ դեպրեսիաների մեջ, բայց այդ ամենն արագ անցնում է։ Կարևորն այն է, որ ունեմ առողջ բալիկ, ինքս էլ առողջ եմ, վստահ եմ՝ կվերականգնեմ նախկին քաշս»,- նշեց նա։
Մայրիկը նաև պատմեց, որ բալիկի հետ ֆիթնեսի է հաճախում։ «Միասին ենք մարզվում, նրա հետ մարզվելը մեծ հաճույք է, շատ հետաքրքիր է։ Քանի որ օգնող չունեմ, բալիկիս գրեթե ամենուր ինձ հետ տանում եմ, այլ տարբերակ չունեմ։ Կամ պետք է չգնամ, կամ էլ Վիկտորիային ինձ հետ տանեմ։ Բալիկս խելոք է, կարողանում եմ նրան տանել ու, այսպես ասած, խայտառակ չլինել։ Երեխաս դրսում իրեն շատ լավ է պահում։ Եթե օգնող ունենայի, իհարկե, կնախընտրեի ամեն տեղ չտանել երեխային, բայց չունեմ»,- եզրափակեց նա։