MediaArm.am-Հայաստանի վարչապետ Նիկոլ Փաշինյանը հայտարարել է իր հրաժարականի մասին: Երկրում պետք է անցկացվեն արտահերթ խորհրդարանական ընտրություններ: Փաշինյանը բոլոր հնարավորություններն ունի այդ պաշտոնը կրկին ստանալու, քանի որ նրան այլընտրանք չկա, և հայերը չեն ցանկանում վերադարձնել հին քաղաքական գործիչներին: Նման կարծիք է glavred.info-ին փոխանցել Ուկրաինայի ապագայի ինստիտուտի միջազգային քաղաքականության և Մերձավոր Արևելքի փորձագետ Իլյա Կուսան:
Ըստ նրա` Լեռնային Ղարաբաղի պատերազմից հետո Հայաստանը հայտնվել է Ռուսաստանի էլ ավելի մեծ ազդեցության տակ: Եթե Փաշինյանը, որը իր քաղաքական գոյատևմամբ պարտական է Ռուսաստանին, կրկին հաղթի, Կրեմլը կշարունակի պաշտպանել նրան, քանի որ նա նրանց համար հարմար է, հաշվի առնելով այն պարտավորությունները, որոնք իր վրա է վերցրել Փաշինյանը, և դա նրան մանևրի ազատություն չի տալիս:
Եթե ընդդիմությունը հաղթի, Ռուսաստանի համար դա նույնիսկ ավելի լավ կլինի, քանի որ նրա որոշ քաղաքական գործիչներ կապված են Ռուսաստանի քաղաքական առաջնորդների հետ:
«Ռուսաստանին, մեծ հաշվով, չի հետաքրքրում, թե ով է հաղթելու ընտրություններում. լավ կլինի ինչպես Փաշինյանի հետ, այնպես էլ առանց նրա, քանի որ ցանկացած արդյունքի դեպքում Ռուսաստանը ոչինչ չի կորցնում: Բայց միևնույն ժամանակ, Ռուսաստանի համար շահավետ չէ նավակը շատ ճոճել», - նկատել է Կուսան:
Հայաստանի հետագա հարաբերությունները արտաքին աշխարհի հետ նույնպես կախված կլինեն Ռուսաստանից: Նրա խոսքով` երկիրը մնում է սեղմված Թուրքիայի, Ռուսաստանի, Ադրբեջանի և Իրանի միջև:
«Մասնավորապես, վերջերս Թուրքիան և Հայաստանը սկսել են խոսել միմյանց հետ տրանսպորտային միջանցքներ բացելու մասին: Եվ նրանք այդ մասին խոսել են ոչ թե նրա համար, որ ուզում են ընկերներ լինել, այլ այն պատճառով, որ համապատասխան կոնյունկտուրան առաջացել է Ռուսաստանի և Թուրքիայի մակարդակում: Եվ այս օրինակը լավ ցույց է տալիս, որ տարածաշրջանային ողջ քաղաքականությունը որոշվում է այդ երկու երկրների կողմից, որը հետագայում ևս հաստատապես կմնա անփոփոխ», - ամփոփել է Կուսան:
