MediaArm.am-Նիկոլ Փաշինյանը «ՌԻԱ Նովոստի»-ին տված հարցազրույցում ասել է, որ նախատեսում է Մոսկվայում Ռուսաստանի նախագահ Վլադիմիր Պուտինի հետ բանակցությունների ընթացքում քննարկել ռազմատեխնիկական համագործակցությանն առնչվող հարցեր: 2018-ին իշխանության գալուց առաջ Փաշինյանը քննադատաբար էր վերաբերվում այն միություններին (ԵԱՏՄ և ՀԱՊԿ), որոնց անդամ է Ռուսաստանի Դաշնությունը:
Սակայն վարչապետ դառնալուց հետո նա հրաժարվել է կտրուկ փոփոխություններ կատարել արտաքին քաղաքականության մեջ: Մինչդեռ, փորձագետները կարծում են, որ իր շրջապատն ավելի հակված է համագործակցելու Արևմուտքի հետ, նկատում է գործակալությունը:
«Ռուսաստանի Դաշնության նախագահի հետ հանդիպման օրակարգում ներառված կլինեն հայ-ռուսական դաշնակցային հարաբերությունների բոլոր ոլորտներին վերաբերող հարցեր, այդ թվում՝ ռազմատեխնիկական ոլորտում համագործակցությունը», - ասել է Փաշինյանը:
Հիշեցնենք՝ փետրվարի վերջին անցկացված կառավարության նիստում Փաշինյանը հայտարարել էր անվտանգության ոլորտում, մասնավորապես՝ բանակի բարեփոխման գործընթացում, Ռուսաստանի Դաշնության հետ համագործակցությունն ամրապնդելու մտադրության մասին: Նա հայտարարել էր ՀՀ պաշտպանության նախարարի գլխավորած աշխատանքային խմբի ստեղծման մասին, որը պետք է կազմեր զինված ուժերի բարեփոխման ճանապարհային քարտեզի ժամանակացույց: Փաշինյանի խոսքով՝ այս գործընթացում հայկական կողմը մտադիր է սերտ համագործակցություն հաստատել անվտանգության ոլորտում թիվ մեկ գործընկերոջ՝ Ռուսաստանի Դաշնության հետ:
Հիշեցնենք՝ մարտի վերջին Փաշինյանը Հայաստանի Արմավիրի մարզի բնակիչների հետ հանդիպման ժամանակ առաջարկել էր մտածել Ռուսաստանի Դաշնության և Հայաստանի զինված ուժերի համատեղ խմբավորումը ուժեղացնելու մասին: Ըստ նրա՝ անհրաժեշտ է գտնել անվտանգության սպառնալիքներին հակազդելու նոր բանաձևեր, իսկ ամենակարևոր բանաձևը հայ-ռուսական ուժերի համատեղ խումբն է, որն արդեն գործում է:
Փաշինյանն այնուհետև ասել էր, որ առաջիկա աշխատանքում, քննարկումներում, բանակցություններում անհրաժեշտ է մտածել խմբավորման ուժեղացման մասին՝ որպես տարածաշրջանային անվտանգության ապահովման էական տարր: