MediaArm.am Սիրելի կանայք, Մեր հրապարակումներում ու ելույթներում մենք՝ բժիշկներս, հաճախ ենք խոսում խնդիրների մասին, փոխարենը հազվադեպ ենք խոսում տարբեր առողջական վիճակներում նորմայի մասին:
Սակայն դա չափազանց կարևոր է: Չէ՞ որ մենք նորմալ վիճակն իմանալով միայն կկարողանանք տարանջատել սահմաններն ու հիվանդագին վիճակները:
Գանգատը, որի մասին ամենից հաճախ են նշում կանայք, սեռական օրգաններից արտադրությունն է: Սա երևույթ է, որն անմիջականորեն ազդում է կնոջ կյանքի որակի վրա՝ բազմաթիվ անհարմարություններ պատճառելով: Գրեթե անհնար է անտեսել արտադրության հետևանքով առաջացած անհարմարությունները՝ տհաճ հոտ, խնդիրներ սեռական հարաբերության ժամանակ:
Փորձենք խնդրին անդրադառնալ այլ տեսանկյունից:
Ի՞նչ է սեռական օրգաններից արտադրությունը:
Հեշտոցի լորձաթաղանթը, արգանդի պարանոցի ցերվիկալ ուղին, հեշտոցամուտքը լորձ են արտադրում: Ու սա միանգամայն բնական երևույթ է: Ֆիզիոլոգիկ արտադրությունն ունի պաշտպանիչ դեր՝ խոնավացնելով խոչընդոտում է բակտերիաների ներխուժումը: Այն ունի ինքնամաքրման ֆունկցիա, գործընթացը հսկվում է հորմոնալ հոմեոստազով:
Արտադրության քանակը կախված է դաշտանային ցիկլի ֆազայից, օրինակ դաշտանային ցիկլի ավարտից հետո նկատվում է քիչ քանակով և թափանցիկ բաղադրության: Օվուլյատոր շրջանում դաշտանային ցիկլի միջնամասի օրերին այն առատ է և ձգվող, իսկ նախադաշտանային շրջանում՝ սպիտակավուն, կրեմային տեսքի:
Եթե կինը կամ աղջիկը նկատում է նման պատկեր, անհանգստանալու կարիք չկա, սակայն ցանկացած փոփոխություն՝ քանակի ու որակի տեսանկյունից պետք է անհանգստացնող լինի: Առատ արտադրություն կարելի է դիտարկել, երբ օրինակ անհնար է առանց ամենօրյա միջադիրների: Կամ, երբ նկատվում է գույնի փոփոխություն՝ մոխրագույնից մինչև կանաչավունի երանգներ: Բաղադրությունն ու տեսքը ևս շատ կարևոր են, մասնավորապես, երբ այն նմանվում է կաթնաշոռի տեսքի կամ խիտ սպիտակավուն երանգ է ստանում: Առավել ուշադիր պետք է լինել արյան հետքերի առկայության, քսվող բնույթի արյունային արտադրության, հոտի առկայության դեպքում: Այս դեպքերից յուրաքանչյուրի պատճառի ու բնույթի մասին սպառիչ պատասխաններ կարող են տալ լաբորատոր հետազոտությունները:
Եվ ուրեմն, եղեք ուշադիր Ձեր օրգանիզմի հանդեպ, մի՛ անտեսեք ահազանգերը:
Եվս մեկ անգամ փաստենք, եր հեշտոցի միկրոֆլորայի խախտումը կարող է նպաստել վերել ճանապարհով ինֆեկցիաների տարածմանը, որոնք իրենց հերթին կարող են հանգեցնել այնպիսի բարդությունների, ինչպիսիք են ձվարանների, արգանդափողերի, արգանդի լորձաթաղանթի բորբոքումները: Իսկ սրանք չափազանց լուրջ վիճակներ են:
Եղե՛ք առողջ, կանխեք հիվանդությունները:
Տաթևիկ Ղորուխչյան
բգթ, գինեկոլոգ, սոնոգրաֆիստ
ՎԱՄՊԳՀԻ մասնաճյուղի ղեկավար
