Hayeli.am Երեկ երեկոյան ադրբեջանական զինված ուժերը, ժամը 18:40-ից սկսած, տարբեր տրամաչափի հրաձգային զինատեսակներից գնդակոծել են սահմանի Երասխի հատվածում տեղակայված հայկական դիրքերը, պարբերաբար կիրառվել են նաև ականանետեր: Պաշտպանության նախարարությունը հաղորդեց, որ Երասխ համայնքի ղեկավարն, «ով այդ պահին կազմակերպում էր ադրբեջանցիների գործողությունների արդյունքում տեղանքում բռնկված հրդեհը մարելու աշխատանքները», վիրավորում է ստացել:
Երասխ համայնքի ղեկավար Ռադիկ Ռաֆիկ Օղիկյանի՝ բեկորային վնասվածք ստանալու դեպքի առթիվ հարուցվել է քրեական գործ՝ ազգային, ռասայական կամ կրոնական ատելության կամ կրոնական մոլեռանդության շարժառիթով, շատերի կյանքի համար վտանգավոր եղանակով սպանության փորձ կատարելու հատկանիշներով [Քրեական օրենսգրքի 34-104-րդ հոդվածի 2-րդ մասի 6-րդ և 13-րդ կետեր], տեղեկացնում է Քննչական կոմիտեն։ Կոմիտեն նշում է, որ երեկ՝ հուլիսի 19-ին՝ ժամը 23:30-ի սահմաններում, Օղիկյանը, գտնվելով Պաշտպանության նախարարության N զորամասի պահպանության տեղամասի մարտական դիրքում, հակառակորդի հետ փոխհրաձգության ընթացքում ստացել է բեկորային վնասվածք՝ աջ բազկի շրջանում:
Այսպես, իրադրությունը հայ-ադրբեջանական սահմանի Երասխի հատվածում լարված է անցած շաբաթվանից, հուլիսի 14-ին փոխհրաձգության հետևանքով հայկական կողմից զոհվել է մեկ զինծառայող, ադրբեջանական կողմից, ըստ պաշտոնական աղբյուրների, մեկ զինծառայող վիրավորվել է:
Գիշերը հայ - ադրբեջանական սահմանին փոխհրաձգությունը շարունակվել է, այս պահին իրավիճակը հանգիստ է, առավոտյան փոխանցել են Պաշտպանության նախարարությունից: «ՀՀ Զինված ուժերը հայտարարում է, որ շփման գծի որևէ փոփոխություն թույլ չի տալու», - ասված է այսօր ավելի ուշ Պաշտպանության նախարարության տարածած հաղորդագրությունում: Այսօրվա հաղորդագրությունում Հայաստանի ռազմական գերատեսչությունը մանրամասնում է, որ ադրբեջանական զինված ուժերը շարունակել են հրաձգային զինատեսակներից, առանց ականանետերի կիրառման, գնդակոծել հայ-ադրբեջանական սահմանի Երասխի հատվածում տեղակայված հայկական դիրքերը երեկ ուշ երեկոյան և հուլիսի 20-ի գիշերը, մինչև ժամը 2-ը:
Հայաստանի պաշտպանության նախարարությունը, հայտարարում է, որ ադրբեջանական կողմն է ժամեր շարունակ տարբեր տրամաչափի զինատեսակներից գնդակոծել հայկական դիրքերը, ինչի հետևանքով վիրավորվել է Երասխի գյուղապետը:
Ադրբեջանի պաշտպանության նախարարությունը, իր հերթին,պնդում է, թե հայկական Զինված ուժերն են գնդակոծում Սադարակի ուղղությամբ ադրբեջանական բանակի դիրքերը, իրենք պատասխան կրակ են բացում: Ադրբեջանական կողմից, ըստ պաշտոնական հաղորդագրության, գիշերը մի զինծառայող է վիրավորվել:
Իրադրությունը հայ - ադրբեջանական սահմանի Երասխի հատվածում լարված է անցած շաբաթվանից, հուլիսի 14-ին փոխհրաձգության հետևանքով հայկական կողմից զոհվել է մեկ զինծառայող, ադրբեջանական կողմից, ըստ պաշտոնական աղբյուրների, մեկ զինծառայող վիրավորվել է: Ադրբեջանի պաշտպանության նախարարությունը հայտարարում է, թե երեկ երեկոյան բանակի զինծառայողներից մեկը` ավագ լեյտենանտ Ռամալ Բադալլին, հրազենային վիրավորում է ստացել Նախիջևանի սահմանային հատվածում` Սադարակի շրջանում:
Փաշինյանը Հայաստան ժամանած օտարերկրացի պաշտոնյաների հետ հանդիպումներում է անդրադառնում Հայաստան-Ադրբեջան լարվածության այս նոր փուլին: Նա ներկայացնում է իրադրությունը, սակայն չի ներկայացնում իրադրության պատճառները:
Ինչպե՞ս է ստացվել, որ 44-օրյա պատերազմում, իրենց իսկ խոսքով՝ հաղթանակ տարած երկրի ղեկավարն այսօր գիշեր-ցերեկ շարունակում է սպառնալ հիմա էլ Հայաստանին, Լեռնային Ղարաբաղի հարցը փակված համարելով:
Կա՞ն բանավոր պայմանավորվածություններ, Ալիևի ախորժակը ինչո՞ւ է մեծանում օր-օրի: Ինչո՞ւ է հիմա էլ Հայաստանը պատերազմի վտանգի առջև կանգնել: Սա՞ է Փաշինյանի խոստացած «Ապագա կա»-ն:
Իսկ գուցե սա եռակողմ՝ Ռուսաստան-Հայաստան-Ադրբեջան լավ մշակած ծրագիր է՝ ինչպե՞ս պատերազմի վտանգի սպառնալիքով Հայաստանին մղել նոր տարածքային զիջումների:
