MediaArm.am Բազմաթիվ մարդիկ, հատկապես երիտասարդները ենթարկվում են սեռավարակներով վարակվելու վտանգին` առաջին հերթին պատահական սեռական հարաբերության հետևանքով:
Սա բացատրվում է տարբեր գործոններով՝ սեռական կյանքի անփորձություն, իրազեկության պակաս, սեփական առողջության թերագնահատում, ռիսկային վարքագիծ և այլն։
Սակայն անվտանգ սեռական հարաբերությունը միայն ՄԻԱՎ-ով կամ սեռական ճանապարհով փոխանցվող այլ հիվանդություններով (ՍՃՓՀ) վարակվելը կամ ձեր զուգընկերներին վարակելը չէ։ Այսօր «անվտանգ սեքսը» ներառում է նաև անցանկալի հղիության կանխարգելումը։
Անվտանգ սեռական հարաբերությունն առաջին հերթին պահպանակի օգտագործումն է, որը, որպես մեխանիկական պաշտպանական շերտ, թույլ չի տալիս, որ դուք վարակեք սեռական զուգընկերոջը կամ վարակվեք նրանից։ «Ոչ ավանդական» սեռական հարաբերությունների համար ևս կան հատուկ պաշտպանական միջոցներ:
Հիշեք, որ պահպանակը կարող է պատռվել և կորցնել իր պաշտպանիչ դերը ոչ ջրային հիմքով լուբրիկանտներ կամ յուղային հիմքով քսուքներ օգտագործելիս (վազելին, կոսմետիկ կրեմներ, բուսական յուղեր)։
ՍՃՓՀ-ից պաշտպանված լինելու լավագույն տարբերակը ավելի քիչ թվով սեռական զուգընկերներ ունենալն է։ Պահպանակից օգտվելուց բացի, խորհուրդ է տրվում նաև հարաբերությունից անմիջապես հետո սեռական օրգանները օճառաջրով լվանալ և միզել։
Եթե կասկածում եք, որ ունեք որևէ ՍՃՓՀ, օրինակ՝ գոնորեա կամ քլամիդիա, պետք է ընդմիջել սեռական հարաբերությունները՝ մինչև կդիմեք բժշկին և կստանաք համապատասխան խորհրդատվություն, իսկ եթե կարիք լինի՝ նաև բուժում։
Եթե ակտիվ սեռական կյանք եք վարում, առավել ևս, եթե ունեք մի քանի սեռական զուգընկեր, ճիշտ կլինի պարբերաբար այցելել բժշկին և կանոնավոր ստուգումներ անցնել։
