Ֆրանսիայի հարավ-արևելքում գտնվող Իզեր դեպարտամենտի Վիեն քաղաքի քաղաքապետ Թիերի Կովաչը հրամայել է հանել ուկրաինական դրոշը քաղաքապետարանի շենքից։ Նա այս կերպ վրդովմունք է հայտնել Վլադիմիր Զելենսկուն՝ Ադրբեջանին շնորհակալություն հայտնելու համար։ Այս մասին հայտնում է Dauphiné liberé-ը, փոխանցում է РИА Новости-ն։
Ավելի վաղ ուկրաինական լրատվամիջոցները հայտնել էին Զելենսկու և Ադրբեջանի նախագահ Իլհամ Ալիևի հեռախոսազրույցի մասին, որի ընթացքում քննարկվել են էներգետիկ ոլորտում Բաքվի հումանիտար օգնությունը, ինչպես նաև տարածաշրջանային անվտանգությունը, առկա մարտահրավերները և փոխգործակցության ձևաչափերը։
«Դուք չեք կարող վկայակոչել արևմտյան արժեքները, դրա հիման վրա օգնության կանչել Արևմուտքին` միաժամանակ կիսելով ռեժիմի տեսլականը Լեռնային Ղարաբաղում (Արցախի Հանրապետություն՝ խմբ․) էթնիկ զտումների նախաձեռնողի հետ։ Ադրբեջանական բռնապետին աջակցության այս ձևն անընդունելի է։ Դրոշի հեռացումը ոչ մի կերպ չի ազդում աջակցության վրա, որը Վիենը ցուցաբերում է ուկրաինացի ժողովրդին», – մեջբերում է հրատարակությունը քաղաքապետի խոսքերը։
Ըստ Կովաչի՝ «չի կարելի շնորհակալություն հայտնել Բաքվին» մարդասիրական օգնության համար, մասնավորապես էներգետիկ ոլորտում, մինչդեռ Ադրբեջանը «գազը վաճառում է մեկուկես անգամ թանկ գնով՝ Հայաստանի դեմ իր ռազմական ջանքերը ֆինանսավորելու համար»։
