SHAMSHYAN.com-ը փետրվարի 6-ին ֆոտոռեպորտաժ և տեսանյութ էր հրապարել Արմավիրի մարզում տեղի ունեցած խոշոր ավտովթարից։
Այդ օրը՝ ժամը 08:45-ի սահմաններում Երևան-Արմավիր ավտոճանապարհին՝ «Դվին» ռեստորանային համալիրի հարևանությամբ, բախվել էին Nissan X-Trail մակնիշի ավտոմեքենան և HOWO մակնիշի բեռնատարը:
Վթարի փաստով Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժնում նախաձեռնվել էր քրեական վարույթ, որի շրջանակում պարզվել է, որ Հովո բեռնատարը վարել է Արմավիրի մարզի բնակիչ 56-ամյա Թելման Մկրտչյանը, ով աշխատում է «ՎԻԿՍ ՄԱՅՆԻՆԳ» ՍՊԸ-ում որպես վարորդ, իսկ Nissan-ը վարել է Արմավիրի մարզի բնակիչ, 34-ամյա Անուշ Հովակիմյանը։ Վերջինը մարմնական վնասվածքներով տեղափոխվել է Վաղարշապատ բժշկական կենտրոն։
Դեռ դեպքի վարում մի քանի քաղաքացիներ, ովքեր հրաժարվել էին տեսախցիկի առջև խոսել, ասում էին՝ վթարի մեղավորը բեռնատարն է եղել, որը վթարային իրավիճակ է ստեղծել Nissan-ի վարորդի համար, ինչն էլ դարձել է վթարի պատճառ և բեռնատարի վարորդը պետք է ավտոմեքենայի վրա տեղադրված հայելիներով նայեր՝ ավտոմեքենայի հետևից ոչ մի տրանսպորտային միջոց չկա, նոր փորձեր շրջադարձ կատարել, սակայն կոպիտ կերպով խախտելով երթևեկության կանոնները՝ վթարային իրավիճակ է ստեղծել Nissan-ի համար։ Իսկ եթե Nissan-ի վարորդը գերազանցեր արագությունը, չէր բացառվում, որ վթարը ծանր հետևանքներ կունենար։
SHAMSHYAN.com-ը ներկայացնում է բացառիկ տեսանյութ, թե ինչպես է տեղի ունեցել վթարը։
Ինչպես ավելի վաղ դեպքի վայրից հայտնել էր ֆոտոլրագրողը, փետրվարի 6-ին խոշոր ավտովթար էր տեղի ունեցել Արմավիրի մարզում: Ժամը 08:45-ի սահմաններում Երևան-Արմավիր ավտոճանապարհի «Դվին» ռեստորանային համալիրի հարևանությամբ բախվել էին Nissan X-Trail մակնիշի ավտոմեքենան և HOWO մակնիշի բեռնատարը: Վթարի հետևանքով Nissan-ի վարորդը մարմնական վնասվածքներով տեղափոխվել էր «Վաղարշապատ» բժշկական կենտրոն: Նրան առաջինը օգնության էր հասել այդ պահին նշված վայրով անցնող Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժնի պետի տեղակալ Արամ Ղուկասյանը, ով ավտոմեքենայից դուրս էր բերել վիրավորին, ապա տեղում առաջին բուժօգնությունն էր ցուցաբերել՝ օգտագործելով իր ավտոմեքենայում պահվող դեղատուփի մեջ եղած բժշկական պարագաները, ապա ահազանգել էր «Վաղարշապատ» բժշկական կենտրոն, որտեղից օպերատիվորեն ժամանած շտապօգնության բժիշկների հերթապահ խումբը՝ Արամ Ղուկասյանի, քաղաքացիների հետ վիրավորին մոտեցրել էին շտապօգնության ավտոմեքենային, ով տեղափոխվել էր «Վաղարշապատ» բժշկական կենտրոն, որտեղից էլ նրան տեղափոխել էին Երևանի հիվանդանոցներից մեկը:
