Հայկական սփյուռքի տարբեր երկրներից մի շարք գործիչներ բաց նամակով դիմել են ՀՀ վարչապետ Նիկոլ Փաշինյանին։
Նամակում, մասնավորապես, ասված է․ «ՀՀ վարչապետ Նիկոլ Փաշինան.
Մենք՝ ներքոստորագրյալներս, գործում ենք Սփյուռքում, բայց օր օրի աշխատում ենք հանուն Հայաստանի, Արցախի և Հայ Դատի։ Մենք հավատացած ենք ազգային Հայաստան-Արցախ-Սփյուռք եռամիասնության հզորությանը և երեքը միասին դիտարկում ենք որպես հայ ազգ:
Վերջին երկու տարում և չորս ամիսներին մեր ժողովուրդը պատերազմում կորցրել ենք մեկ սերունդ, Արցախի 72%-ը, մոտ 140 քառակուսի կիլոմետր՝ ինքնիշխան Հայաստանից, որից առնվազն 40-ը կորցրել ենք առանց դիմադրության, ինչպես նաև փաստում ենք հարյուրավոր զինվորների մահը 2022 թվականի սեպտեմբերյան ադրբեջանական հարձակման (պատերազմի) հետևանքով, անհայտ թվով ապօրինի գերիները Բաքվում և ներկայումս Արցախի ցեղասպանական շրջափակումը:
Պարոն Փաշինյան, Ձեր նախընտրական ծրագիրը, ինչպես նաև Ձեր կառավարության ծրագիրը, որը 2021 թ․հաստատվել է Ազգային ժողովի կողմից, հաստատում է Արցախի ժողովրդի ինքնորոշման իրավունքը (ներառյալ՝ Հադրութի և Շուշիի վերադարձը)։
Միջազգային իրավունքով երաշխավորված այս հիմնարար իրավունքը Արցախը հայ պահելու և Ադրբեջանի ու Թուրքիայի ցեղասպան նկրտումները զսպելու առանցքային ուղին է։ Այնուամենայնիվ, դուք հետ եք գնացել այս կարևոր կետից, և ձեր խոսույթը, ինչպես հրապարակայնորեն, այնպես էլ խաղաղության պայմանագրի շուրջ ձեր բանակցություններում, հրաժարվել է Հայաստանի՝ տասնամյակներ շարունակ ձգտող Արցախի ինքնորոշման իրավունքի հետապնդումից:
Միայն այս երկու կետերը, չանդրադառնալով Հայաստանում ժողովրդավարության արագ դեգրադացմանը, մեր զինվորների անտեսված պայմաններին՝ նույնիսկ թշնամու առջև գտնվող ամենախոցելի դիրքերում, բավարար են, որպեսզի մենք՝ որպես սփյուռքահայեր, պահանջենք Ձեր անհապաղ հրաժարականը Հայաստանի Հանրապետության վարչապետի պաշտոնից։
Դուք ինքներդ ձեզ և ձեր կառավարությանը տվել եք շատ ավելի լայն իրավունքներ և լիազորություններ, քան այն, ինչ Հայաստանի Հանրապետության գործող Սահմանադրությունն է տալիս վարչապետին։ Ձեր գործողությունների հետևանքները բացասաբար են անդրադառնում ոչ միայն Հայաստանի և Արցախի, այլ ողջ հայության վրա: Ուստի մենք մեզ իրավունք ենք տալիս անհապաղ պահանջել ձեր հրաժարականը։
Միևնույն ժամանակ, մենք ձեռնպահ ենք մնում փոխարինող առաջարկելուց, քանի որ հարգում ենք վարչապետի հրաժարականի վերաբերյալ ՀՀ Սահմանադրությամբ և Ընտրական օրենսգրքով նախատեսված քաղաքական գործընթացները, որոնք երկուսն էլ պաշտոնաթող վարչապետին հնարավորություն չեն տալիս պահպանելու պաշտոնի լիազորությունները՝ մինչև Հայաստանի քաղաքացիների կողմից փոխարինող չընտրվի, անընդունելի գործողություն, որը դուք իրականացրել եք որպես 2021 թվականին վերընտրվելու նախադրյալ։
Պարոն Փաշինյան, մենք՝ որպես ազգաշինության գործի ակտիվ մասնակիցներ, կոչ ենք անում անհապաղ հրաժարական տալ Հայաստանի Հանրապետության վարչապետի պաշտոնից և լիազորություններից՝ որպես միակ միջոց՝ կանխելու համահայկական աղետը, որը սպառնում է մեր ազգին ձեր շարունակական ղեկավարության ներքո:
Միացե՛ք որպես այս բաց նամակին ստորագրող՝ ներկայացնելով ձեր տվյալները։ Մուտքագրեք միայն այն տեղեկությունները, որոնք ցանկանում եք ցուցադրել որպես ստորագրող: Ձեր էլ.փոստի հասցեն չի հրապարակվի, այլ կօգտագործվի բացառապես անհրաժեշտության դեպքում ձեզ հետ շփվելու համար»։
Նամակագիրները նաև կոչ են արել մյուս քաղաքացիներին ևս անվանապես միանալ իրենց կոչին։
Նամակը ստորագրած սփյուռքահայ գործիչների ցանկն ու այլ մանրամասները՝ այս հղումով։
