Շաբաթ օրը՝ ապրիլի 22-ին, մի խումբ զինված զինյալներ հարձակվել են Մալիի կենտրոնում գտնվող ռազմական օբյեկտի վրա, որը տեղական իշխանություններն անվանում են ռուսական ռազմաբազա։ Այս մասին հայտնում է AFP-ն։
Հաղորդվում է 19 զոհի և 60 վիրավորի մասին:
«Ջիհադիստները հարձակվել են օդանավակայանի և դրա կողքին գտնվող ռուսական բազայի վրա»,- ասել է տեղի պաշտոնյան, ով խնդրել է անանուն մնալ։ «Ռուսական բազան և նրանց ինքնաթիռները հարձակման են ենթարկվել: Ջիհադիստները շրջափակել են օդանավակայանի մի մասը», - ասել է մեկ այլ տեղացի պաշտոնյա:
Առավոտյան ժամը 5:30-ի սահմաններում չորս ուժգին պայթյուն է որոտացել, որին հաջորդել են ավտոմատների կրակոցներ։ Մալիում ՄԱԿ-ի կայունացման առաքելության (MINUSMA) սենեգալցի զինվորներին հաջողվել է դանդաղեցնել ջիհադիստների առաջխաղացումը, ասել է պաշտոնյան:
MINUSMA առաքելության բազան գտնվում է օդանավակայանի և ռազմակայանի կողքին, որտեղ, ինչպես ասվում է, տեղակայված են Wagner PMC-ի զինյալները:
Առաքելության խոսնակը հրաժարվել է AFP-ին մեկնաբանել այդ հարցը:
2020 թվականի օգոստոսից Մալին կառավարվում է զինվորականների կողմից, որոնք խզել են Ֆրանսիայի հետ երկարամյա դաշինքը և ռազմականապես և քաղաքականապես կողմնորոշված են դեպի Ռուսաստանը։
