Քիչ առաջ հայտնեցինք, որ քննչական կոմիտի որոշմամբ ոստիկանությունը ձերբակալել եւ վարույթն իրականացնող մարմնին է ներկայացրել «Քաղաքացիական գիտակցություն» ՀԿ նախագահ, «Իմնեմնիմի» հաղորդման հաղորդավար Նարեկ Սամսոնյանը։
Քննչական կոմիտեից հայտնեցին, որ Սամսոնյանը ձերբակալվել է խուլիգանության հոդվածով՝ Քր. օրենսգրքի 297 հոդվածի 2-րդ մասի 1-ին և 3-րդ կետերով։
«Անտիֆեյք» կայքի խմբագիր Աստղիկ Մաթեւոսյանը Սամսոնյանին ձերբակալելու վերաբերյալ որոշ մանրամասներ մեզ հայտնեց։ «Դեռեւս չգիտենք, թե ինչ պատճառով են ձերբակալել։ Վերջին շրջանում առանձնապես լուրջ բան չի եղել, որը կարող էր ձերբակալության առիթ տալ։
Նախավերջին եթերն է մի քիչ կոպիտ եղել՝ բռնությունների թեմայով։ Տեսանյութից ակնհայտ երեւում է, որ վրեժխնդրության հարց կա, պառկեցնում են գետնին, գլուխը սեղմում ցեխի մեջ։ 4 մեքենայով են եղել՝ մի մասը քաղաքացիական հագուստով, մյուս մասը՝ ոստիկանական, ու դիմակներով։ Չեն ներկայացել, հարձակվել են, քաշքշել են անգամ տեսնայութը նկարողին»,-պատմեց Մաթեւոսյանը։
Նարեկ Սամսոնյանին ձերբակալել են առավոտյան, երբ նա տանից դուրս է եկել։
