Երեկ՝ հուլիսի 8-ին, խոշոր ու ողբերգական ավտովթար է տեղի ունեցել Արագածոտնի մարզում։ Ժամը 23։40-ի սահմաններում Արագածոտնի մարզի բնակիչ 34-ամյա Հարություն Ա․-ն իր վարած «ՎԱԶ 2110» մակնիշի ավտոմեքենայով Երևան-Գյումրի ավտոճապարհի Ուջան գյուղի վարչական տարածքում, դեպի Ուջան ընթանալիս դուրս է եկել հանդիպակաց երթևեկելի գոտի, բախվել երկաթե արգելապատնեշներին, մոտ 10 մետր կոտրել և հայտնվել երթևեկելի գոտուց դուրս՝ դաշտամիջյան հատվածում։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով ավտոմեքենայի ուղևոր, Արագածոտնի մարզի բնակիչ 25-ամյա Արման Ա․-ն տեղում մահացել է, վարորդը քաղաքացիների օգնությամբ դուրս է բերվել ավտոմեքենայից և տեղափոխվել «Աշտարակ» բժշկական կենտրոն, որտեղից էլ տեղափոխվել է Երևանի հիվանդանոցներից մեկը։
Վիրավորին առաջինը օգնության են հասել քաղաքացիներն ու «Աշտարակ» բժշկական կենտրոնի շտապօգնության բժիշկների հերթապահ խումբը։
Օպերատիվորեն ժամանել են ՀՀ Ներքին գործերի նախարարության փրկարար ծառայության Աշտարակի թիվ 19 հրշեջ փրկարարական ջոկատից՝ 1 մարտական հաշվարկ։
Հրշեջ փրկարարները հոսանքազրկել են ավտոմեքենան, մահացածի մարմինը դուրս են բերել ավտոմեքենայից, մոտեցրել դիատարին և տեղում իրականացրել հերթապահություն։
Պարեկների այսքան շատ ժամանման պատճառը նրանում, քանի որ մինչ նրանց գալը հետաքրքրասեր վարորդները կայանել էին ավտոմեքենաները և ստեղծվել էր արհեստական խցանում, նրան գալուց կարճ ժամանակ անց երթևեկությունը կարգավորվեց։
Տեղում քննչական աշխատանքները ղեկավարող Ն․ Քասյանի որոշմամբ վթարի փաստով նախաձեռնվել է քրեական վարույթ։ Նրա հանձնարարականով մետաղե ջարդոնի վերածված ավատոմեքենան տեղափոխվել է ոստիկանության Աշտարակի բաժնի պահպանվող հատուկ տարածք։
