Այսօր՝ սեպտեմբերի 7-ին, ողբերգական ավտովթար է տեղի ունեցել Լոռու մարզում։ Ժամը 14։10-ի սահմաններում ՀՀ Ներքին գործերի նախարարության Փրկարար ծառայության 911 Ճգնաժամային կառավարման ազգային կենտրոն ահազանգ է ստացվել, որ М6 միջպետական ճանապարհից դեպի Մոտկորի շրջան գնացող ճանապարհի 15-րդ կմ հատվածում ավտոմեքենան դուրս է եկել երթևեկելի գոտուց, մի քանի մետր գլորվելով՝ հայտնվել է անտառում, բախվելով ծառերին։
Ինչպես դեպքի վայրից հայտնում է ֆոտոլրագրող Գագիկ Շամշյանը, ժամանել են Լոռու թիվ 39 հրշեջ-փրկարարական ջոկատից 1 մարտական հաշվարկ։
Վթարի վայրից բժիշկները 1 հոգու նախ տեղում առաջին բուժօգնությունն են ցուցաբերել, ապա տեղափոխել «Ալավերդի» բժշկական կենտրոն։
Հրշեջ-փրկարարներն ու պարեկները Mitsubishi մակնիշի ավտոմեքենայի միջից, օգտագործելով հատուկ տեխնիկա, դուրս են բերել մահացածի մարմինը։
Վթարի փաստով Թումանյանի քննչական բաժնում նախաձռնվել է քրեական վարույթ։
Ոստիկանությունն ու քննչական բաժինը պարզում են վարորդի, մահացածի և վիրավորի ինքնությունը։
Գ․ Շամշյանի տեղեկություններով՝ ավտոմեքենան հաշվառված է «Պատմամշակութային արգելոց-թանգարանների և պատմական միջավայրի պահպանության ծառայություն» պետական ոչ առևտրային կազմակերպության հաշվեկշռում։