Hraparak.am-ը գրում է․ Արցախում Մարտակերտի և Շահումյանի շրջանների դատախազության հսկողությամբ քրեական գործ է հարուցվել 3 եւ 6 տարեկան երեխաների մահվան առթիվ։ Արցախի քննչական կոմիտեի հաղորդագրությունից երեւում է, որ քննիչների թիրախում երեխաների մայրն է։
Գործը, ըստ տարածած հաղորդագրության, հարուցվել է ԱՀ ՔՕ 108-րդ հոդվածի 2-րդ մասով՝ «Անզգուշությամբ մահ պատճառելը» և 176-րդ հոդվածով՝ «Երեխային դաստիարակելու պարտականությունը չկատարելը»։
Փաստորեն, երկու երեխաների կորուստը Արցախի քննչական մարմինները փոքր պատիժ են համարել և որոշել են նաև բանտ ուղարկել երկու զավակին ողբերգորեն կորցրած կնոջը։ «Վ. Ն.-ն, հանդիսանալով 14.03.2020թ. ծնված Լ. Ն.-ի և 20.12.2017թ. ծնված Գ.Ն.-ի մայր ծնողը, երեխաների դաստիարակությունը և խնամքը ոչ պատշաճ կատարելով, 2023 թ. հուլիսի 07-ին, ժամը 14:00-ի սահմաններում, ԱՀ Մարտակերտի շրջանի Աղաբեկալինջ համայնքում իրենց ժամանակավոր բնակության առաձնատանը վերջիններիս թողնելով առանց հսկողության՝ դուրս է եկել տնից, որից հետո նույն օրը, ժամը 17:30-ի սահմաններում վերադառնալով, տեսել է, որ երեխաները տանը չեն: Այնուհետև, հուլիսի 08-ին ժամը 07:30-ին, անչափահասներ Գ.Ն.-ն և Լ.Ն.-ն հայտնաբերվել են Մարտակերտ քաղաքի Գ.Նժդեհ-4 հասցեի մոտ կայանված BMW մակնիշի ավտոմեքենայի մեջ՝ մահացած վիճակում», - ասված է հաղորդագրության մեջ:
Ինչպես ավելի շուտ էին հայտնել, երեխաների մահվան պատճառը բարձր ջերմաստիճանն է եղել ավտոմեքենայի ներսում։ Ըստ արցախցիների շրջանում պտտվող խոսակցությունների, ջերմաստիճանը մեքենայում եղել է մոտ 70 աստիճան։ Բնակիչների մի մասը չի հավատում այս վարկածին։ «Իբրեւ թե, շոգից են խեղդվել, բայց ո՞նց եղավ, որ երեխաները լաց չեղան, կամ՝ էդ գյուղը Մարտակերտից հեռու է, ո՞նց են էդ երեխաները հասել այնտեղ, ու ոչ ոք նրանց չի նկատել։ Հնարավոր է, ինչ-որ բան գաղտնի են պահում, որ խուճապ չառաջացնեն», - ասում է բուժաշխատող Մ․ Զ-ն։
Արցախցիներն արդեն իրենց դատն արել են հօգուտ երեխաների մոր։ Մարդիկ իրար են փոխանցում տելեգրամ ալիքներում պտտվող գրառում այն մասին, որ եթե երեխաները կուշտ լինեին, մայրը ստիպված չէր լինի այդքան հեռու գնալ սնունդ հայթայթելու։ «Եթե տրանսպորտն աշխատեր, մայրը երեխաներին իր հետ կտաներ, եթե լիներ վառելանյութ, վարորդը իր մեքենային ավելի շուտ կմոտենար, եթե․․եթե։ Բայց Արցախում այդ ամենը չկա ադրբեջանական շրջափակման պատճառով, և երեխաներին հայտնաբերել են միայն մեկ օր անց, շոգից մահացած վիճակում», ասում են արցախցիները։