Ռուսական պետհամարանիշներով մեքենաների Բուլղարիա մուտքի արգելքը կսկսի գործել մինչև երկուշաբթի օրվա վերջ. հայտարարել է Բուլղարիայի սահմանային ոստիկանության պետ Անտոն Զլատանովը։
«Հինգշաբթիից մինչև երեկ մենք շատ ակտիվ աշխատեցինք։ Վստահ եմ, որ մինչև օրվա վերջ (երկուշաբթի) Բուլղարիա կսկսի գործել ռուսական մեքենաների մուտքի արգելքը»,– մեջբերում է 24 Hours հրատարակությունը։
Արգելքը վերաբերում է ոչ միայն մեքենաներին, այլեւ բեռներին։ Սահմանային ոստիկանության տնօրենը չկարողացավ ճշտել, թե ամսական քանի ռուսական մեքենա է մտնում Բուլղարիա, սակայն պարզաբանեց, որ դրանք շատ չեն։
Նախկինում Եվրահանձնաժողովը պարզաբանում էր հրապարակել, որում ասվում էր, որ դեռևս 2022 թվականին ԵՄ Խորհրդի կողմից Ռուսաստանի դեմ կիրառված պատժամիջոցները վերաբերում են նաև ՌԴ քաղաքացիների՝ ռուսական հաշվառման համարանիշերով ավտոմեքենաներին, և, համապատասխանաբար, ՌԴ քաղաքացիները չեն կարող անձնական մեքենաներ վարել Եվրամիության տարածքում, նույնիսկ զբոսաշրջային նպատակներով և կարճ ժամանակով։
Ավելի վաղ հայտնել էինք, որ, Լատվիան ևս արգելել է այն մեքենաների մուտքը, որոնք գրանցված են Ռուսաստանում։ Մաքսային մարմինները կառգրավեն ավտոմեքենաները, եթե անձը հրաժարվի վերադառնալ Ռուսաստան կամ Բելառուս. հաղորդում է Հանրապետության պետական եկամուտների ծառայությունը։
Էստոնիան ևս արգելել է ռուսական պետհամարանիշներով մեքենաների մուտքը երկիր։ Այս մասին հայտնում են տեղական լրատվամիջոցները։ Այսպես է երկիրը արձագանքել Ռուսաստանի Դաշնության դեմ պատժամիջոցների վերաբերյալ Եվրահանձնաժողովի հանձնարարականներին: Մեքենաները ենթակա են միջազգային սահմանափակումների:
Հիշեցնենք, որ ռուսաստանցիներին արգելվել է մուտք գործել ԵՄ անձնական սմարթֆոններով, նոութբուքերով, կոսմետիկ միջոցներով և ռուսական գրանցումով մեքենաներով։ Այս ապրանքների ներմուծումը ԵՄ երկրներ կարող է դիտվել որպես արգելված ներմուծում. հայտարարել է Եվրահանձնաժողովը:
