Այսօր՝ փետրվարի 22-ին, խոշոր ավտովթար է տեղի ունեցել Երևանում։ Ժամը 18։00-ի սահմաներում Հրազդանի կիրճում բախվել են Երևանի բնակիչներ 64-ամյա Հուսիկ Հովսեփյանի վարած Nissan Tiida մակնիշի և 26-ամյա Ֆիլիպ Ղազարյանի վարած Toyota Camry մակնիշի ավտոմեքենաները։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով երկու վարորդները օպերատիվորեն վթարի վայր ժամանած շտապօգնության բժիշկների կողմից նախ տեղում առաջին բուժօգնություն են ստացել, ապա տեղափոխվել են հիվանդանոց։շ
Տեղում տարածքը սահմանազատել, ուժեղացված ծառայություն են կատարում նույն վաշտի ավագ պարեկ Ռազմիկ Ղարիբյանն ու պարեկ Խաչիկ Պետրոսյանը։
Երթևեկությունը նշված հատվածում ժամանակավորապես դադարեցվել է։
Վթարի մասին Պարեկային ծառայության Երևանի գնդից տեղեկությունը փոխանցել են Հայաստանի Քննչական կոմիտեի Երևան քաղաքի Քննչական վարչության ճանապարհատրանսպորտային հանցագործությունների քննության բաժին, որտեղից ժամանել է Քննչական խումբը՝ բաժնի պետ Գոռ Թադևոսյանի, բաժնի պետի տեղակալ Սամվել Սամվելյանի և քննիչ Արամազդ Հարությունյանի գլխավորությամբ։