SHAMSHYAN.com-ը մարտի 23-ին ֆոտոռեպորտաժ, տեսանյութ էր հրապարակել Արարատի մարզում տեղի ունեցած խոշոր ավտովթարի փաստով:
Ժամը 01:30-ի սահմաններում Երևան-Երասխ ավտոճանապարհի 12 կմ հատվածում բախվել էին 2 «BMW» և «Mercedes» մամկնիշի ավտոմեքենաները:
Բախման հետևանքով այնուհետև «BMW»-ներից մեկը դուրս էր եկել ճանապարհի երթևեկելի գոտուց, բախվել CPS բենզալցակայանի առջև տեղադրված ծաղկամաններից մի քանիսին և կողաշրջված վիճակում բախվել բենզալցակայանի վահանակին և բենզալցակայանի կետին:
Վթարի հետևանքով «BMW»-ի վարորդի կինն ու նրա 3 անչափահաս երեխաները տեղափոխվել էին «Սուրբ Աստվածամայր» բժշկական կենտրոն:
SHAMSHYAN.com-ը ներկայացնում է բացառիկ տեսանյութ՝ ինչպես է տեղի ունեցել «BMW»-ի բախումը բենզալցակայանին:
Ինչպես ավելի վաղ դեպքի վայրից հայտնել էր ֆոտոլրագրողը, մարտի 23-ին, խոշոր ավտովթար էր տեղի ունեցել Արարատի մարզում։ Ժամը 01։30-ի սահմաններում Երևան- Երասխ ավտոճանապարհի 12 կմ հատվածում բախվել էին Երևանի բնակիչներ 32-ամյա Հակոբ Մ․-ի վարած «BMW» մակնիշի, 38-ամյա Լևոն Զ․-ի վարած «Mercedes» մակնիշի և 48-ամյա Տիգրան Դ․-ի վարած «BMW» մակնիշի ավտոմեքենաները։
Բախման հետևանքով Հակոբ Մ․-ն կորցնելով ավտոմեքենայի կառավարումը դուրս էր եկել երթևեկելի գոտուց դեպի աջ, բախվել երկաթբետոնե սյանը, ապա առաջ ընթացել կոտրել «CPS» բենզալցակայանի առջև տեղադրված ծաղկամաններից և կողաշրջված վիճակում բախվել բենզալցակայանի վահանակին և լցակայանի կետին։
Վթարի հետևանքով Հակոբ Մ․-ի ուղևորներ, Երևանի բնակիչներ 32-ամյա Ս․ Մ․-ն մարմնական վնասվածքներով տեղափոխվել էին «Էրեբունի» բժշկական կենտրոն, իսկ 12-ամյա Մ․ Մ․-ն, 7-ամյա Ա․ Մ․-ն և 9-ամյա Ա․ Մ․-ն, մարմնական վնասվածքներով տեղափոխվել էին «Սուրբ Աստվածամայր» բժշկական կենտրոն։
Վիրավորներին առաջինը օգնության էին հասել «CPS» բենզալցակայանի աշխատակիցները, ովքեր մինչ ՀՀ Ներքին գործերի նախարարության փրկարար ծառայության Մասիսի թիվ 25 հրշեջ փրկարարական ջոկատի և «Մասիս» բժշկական կենտրոնի շտապօգնության բժիշկների ժամանումը վիրավորներին դուրս էին բերել ավտոմեքենայից և տեղում անհրաժեշտ բուժօգնություն են ցուցաբերել, ապա հրշեջ փրկարարները հոսանքազրկել էին կողաշրջված «BMW»-ն, փակել գազաբալոնն ու տեղում իրականացրել հերթապահություն։
Դեպքի վայրում պարեկներն ու քննիչները տեղեկություններ էին ստացել, որ «BMW»-ի վարորդ Հակոբ Մ․-ի համար «Mercedes»-ը ստեղծել էր վթարային իրավիճակ ու Հակոբ Մ․-ն, փորձելով խույս տալ «Mercedes»-ի հետ բախումից այնուամենայնիվ բախվել էր, ինչն էլ դարձել էր ավտոմեքենան կառավարել չկարողանալու պատճառ և տեղի էր ունեցել վթարը։ Այդ տեղեկությունը պարզվում է։
Վարորդները ենթարկվել էին սթափության փորձաքննության, եղել էին սթափ, իսկ վիրավորները «BMW»-ի վարորդի կինն ու երեխաներն են։