Երբ ինձ ասում են՝ զբաղվո՞ւմ եք քաղաքականությամբ, թե ոչ, միշտ այլ կերպ եմ փորձում այդ հարցին մոտենալ. ես 20 տարեկանից սկսած ծառայում եմ իմ հայրենիքին ու շարունակում եմ ծառայել։ Այս մասին Ղարաբաղյան շարժման 35 ամյակին նիրված կոնֆերանսի ժամանակ լրագրողների հետ զրույցում ասաց «Հայրենիք» կուսակցության ղեկավար Արթուր Վանեցյանը:
Խոսելով խորհրդարանում իր գործունեությունը դադարեցնելու մասին՝ Վանեցյանը ասաց․
«Ես համարում եմ, որ խորհրդարանը այլևս չի հանդիսանում այն գործիքը, որով կարող եմ էֆեկտիվ պայքարել այս իշխանություններիի դեմ ու ծառայել մեր երկրին։ Այս ընթացքում մենք զբաղվել ենք կուսակցաշինությամբ, մարդկանց հետ հանդիպումներով։
Այո, միգուցե հանրային գործունեություն չենք ծավալել, բայց դա որևէ կերպ չի խանգարում մեր հասարակական-քաղաքական գործունեությանը։ Առաջիկայում ինձ և իմ գործընկերներին ավելի հաճախ կտեսնեք տարբեր միջոցառումներին, տարբեր հարթակներում»։
Վանեցյանը անդրադարձավ նաև հայ-թուրքական սահմանի բացման հնարավոր հետևանքներին։
«Հանրության շրջանում կա մի գաղափար, որ ասում են Թուրքիայի սահմանը բացվի, լավ կապրենք, հարց եմ ուզում ուղղել բոլորին՝ արդյո՞ք ՀՀ-ի անվտանգային համակարգը այսօր պատրաստ է ունենալ Թուրիքիայի հետ բաց սահման, թե ոչ, արդյոք ՀՀ-ի տնտեսությունը պատրաստ է ունենալ բաց սահման Թուրքիայի հետ։ 21-րդ դարում ունենալ փակ սահմաններ, անթույլատրելի է, բայց Հայաստանը պետք է դրան պատրաստվի ու նոր գնա այդ քայլին։ Հիշեցնեմ, որ Հայաստանը Թուրքիայի հետ երբեք սահման չի փակել, Թուրքիան է Հայաստանի հետ միակողմանի փակել սահմանը, եթե ուզում են բացեն, ապա մենք չէ, որ պետք է գնանք խնդրենք։ Եթե ուզում են բացեն, թող բացեն, դրանից հետո մենք կխոսենք»,- ասաց Արթուր Վանեցյանը։
